VestmannatunnilinFerðslutalið kann ikki standa einsamalt
Í kjakinum um Gøtudalstunnilin og Vestmannatunnilin verður ofta víst á, at fleiri bilar koyra um Gøtueiði. Ferðslumongdin hevur týdning, men hon kann ikki einsamøll avgera raðfestingina. Vit mugu eisini hyggja at trygdini, veðurviðurskiftunum og tí, hvussu álítandi farleiðin er hjá teimum, sum brúka hana hvønn dag.
Ein langur teinur uppi í hæddini
Sambært grafinum røkkur leiðin um Gøtueiði umleið 135 metrum, meðan Vestmannavegurin um Høgareyn fer upp í umleið 280 metrar. Men munurin er eisini longdin á teininum uppi í hæddini: Umleið sjey kilometrar av Vestmannavegnum liggja í somu hædd sum hægsta punktið á Gøtueiði ella hægri.
Reyða linjan fer langt upp um ta grønu og heldur sær høgt yvir ein langan tein. Tað merkir, at vit koyra eftir høgtliggjandi fjallavegi nógv longri. Tí eiga bæði hæddin og tann langi teinurin at telja við, tá tørvurin á einum tunli til Vestmanna verður mettur.
Tá vegurin er opin, men túrurin kennist ótryggur
Fyri okkum, sum koyra her, er hetta gerandisdagur. Veðrið niðri í bygdini kann vera heilt øðrvísi enn uppi á Høgareyni. Um heystið og veturin kunnu myrkur, vindur, hálka, kavi og jarðrok gera ferðina krevjandi. Seyður á vegnum kann skapa enn eina óvæntaða støðu.
Teir dagarnar, vegurin er stongdur, vita vit, at vit mugu halda okkum heima. Men tað eru allir hinir dagarnir, tá vegurin er opin, men óttin fyri ferðini kortini situr í okkum. Vit skulu til arbeiðis, í skúla, til lækna ella heim til familjuna, hóast vit kenna okkum ótrygg á vegnum. Tann óttin sæst ikki í eini vanligari samanbering av kilometrum og minuttum.
Stórar íløgur eru longu gjørdar aðrastaðni
Eysturoy og Norðoyggjar hava fingið stórar samferðsluútbyggingar, meðan vit í Vestmanna hava bíðað eftir okkara tørni. Eysturoyartunnilin, nýggju tunlarnir Norður um Fjall og nýggja farleiðin til Viðareiðis eru ítøkilig dømi um, hvussu samferðslan kann lyfta eitt øki.
Tunnil.fo upplýsir kostnaðin fyri Eysturoyartunnilin til 1.300 milliónir krónur. Landsverk upplýsir játtanina til nýggju farleiðina til Viðareiðis, við tunli og vegum, til 162 milliónir krónur. Hetta eru dømi um stórar verkætlanir, sum eru framdar, meðan Vestmanna framvegis bíðar eftir eini farleið undir fjallinum.
Íløgur skapa eisini fólkavøkstur
Tá fólkatal og ferðslumongd verða brúkt sum grundgeving fyri enn fleiri íløgum, mugu vit minnast, at sambandið gongur báðar vegir. Betri samferðsla kann skapa fortreytir fyri, at fólk og vinna flyta til eitt øki. Fólkavøkstur kann sostatt eisini vera eitt úrslit av íløgum, sum longu eru gjørdar.
Um vit altíð raðfesta tey øki, sum longu vaksa mest, kann ein ónd ringrás taka seg upp: Tey, sum bíða eftir betri sambandi, fáa torførari við at skapa vøkstur — og tann vantandi vøksturin verður síðani brúktur sum grundgeving fyri at lata tey bíða enn longur. Vestmanna skal eisini hava møguleikan at mennast.
Við rundkoyringini fáa fleiri túsund fólk ágóðan
Fyrr hevur eisini verið ført fram, at fleiri fólk búgva í øðrum økjum, og at tunnlar tí eiga at gerast har fyrst. Men við uppskotinum um eina felags rundkoyring inni í fjallinum og tunnilsarmar til Vestmanna, Leynar og Hvalvík verður økið, sum fær ágóðan, munandi størri.
Tá kunnu fleiri túsund fólk fáa ágóða av styttri leiðum og betri sambandi. Loysnin knýtir Norðstreymoy tættari saman og kann eisini stytta leiðina til Vágar og flogvøllin hjá fólki úr Sundalagnum, Eysturoy og Norðoyggjum. Tá fólkatalið verður brúkt í raðfestingini, eiga vit tí at telja øll tey, sum fáa ágóðan av felags loysnini — ikki bara tey, sum búgva í Vestmanna.
Daglig trygd eigur at viga tungt
Vit skilja væl ynskið um Gøtudalstunnilin. Hann kann stytta ferðir og lætta um ferðsluna. Men tá hesar báðar verkætlanir skulu raðfestast, halda vit, at dagliga trygdin á einastu vanligu vegleiðini til og úr Vestmanna eigur at viga serliga tungt.
Við einum tunli sleppa vit undan sjálvum túrinum um Høgareyn. Tað hevur týdning fyri fólkini í Vestmanna og á Válunum, fyri familjur, arbeiðspláss og vinnulív. Nakrir spardir minuttir eiga ikki einsamallir at viga tyngri enn tørvurin á eini tryggari og álítandi farleið hjá einari heilari bygd.
Tí halda vit, at Vestmannatunnilin eigur at gerast fyrst.
Vit hava bíðað nóg leingi. Nú er okkara tørn komin.
